ಶಿರಸಿ: ತಂದೆಯೊಂದಿಗೆ ಮನೆಯಲ್ಲಿ ನೆಮ್ಮದಿಯಾಗಿ ಮಲಗಿದ್ದ ಇಬ್ಬರು ಮುಗ್ಧ ಮಕ್ಕಳ ಮೇಲೆ ವಿಷಪೂರಿತ ಹಾವೊಂದು ದಾಳಿ ನಡೆಸಿದ ಪರಿಣಾಮ, 12 ವರ್ಷದ ಬಾಲಕನೊಬ್ಬ ಜವರಾಯನಿಗೆ ಬಲಿಯಾಗಿದ್ದು, ಆತನ ಸಹೋದರಿ ಆಸ್ಪತ್ರೆಯಲ್ಲಿ ಸಾವು-ಬದುಕಿನ ನಡುವೆ ಹೋರಾಡುತ್ತಿರುವ ದಾರುಣ ಘಟನೆ ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ಬನವಾಸಿ ವ್ಯಾಪ್ತಿಯ ಸಹಸ್ರಳ್ಳಿ ಗ್ರಾಮದಲ್ಲಿ ಮಂಗಳವಾರ ತಡರಾತ್ರಿ ಸಂಭವಿಸಿದೆ.
ಸ್ಥಳೀಯ 6ನೇ ತರಗತಿ ವಿದ್ಯಾರ್ಥಿ ಮಿಥನ್ ಪುಟ್ಟಪ್ಪ ನಾಯಕ್ (12) ಮೃತಪಟ್ಟ ದುರ್ದೈವಿ ಬಾಲಕನಾಗಿದ್ದು, ಈತನ ಸಹೋದರಿ ದೀಕ್ಷಾ ಪುಟ್ಟಪ್ಪ ನಾಯಕ್ ಪ್ರಸ್ತುತ ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿ (ICU) ಸಾವು-ಬದುಕಿನ ನಡುವೆ ಹೋರಾಡುತ್ತಿದ್ದಾಳೆ.
ರಾತ್ರಿ ಎಂದಿನಂತೆ ಮಿಥನ್ ಮತ್ತು ದೀಕ್ಷಾ ರಾತ್ರಿ ಊಟ ಮುಗಿಸಿ ತಮ್ಮ ತಂದೆಯೊಂದಿಗೆ ಮನೆಯಲ್ಲಿ ಮಲಗಿದ್ದರು. ಆದರೆ, ತಡರಾತ್ರಿ ಕತ್ತಲಲ್ಲಿ ನುಗ್ಗಿದ ವಿಷಪೂರಿತ ಹಾವೊಂದು ಇಬ್ಬರೂ ಮಕ್ಕಳಿಗೆ ಕಚ್ಚಿದೆ. ಮಧ್ಯರಾತ್ರಿ ಇದ್ದಕ್ಕಿದ್ದಂತೆ ಇಬ್ಬರೂ ಮಕ್ಕಳು ಎಚ್ಚರಗೊಂಡು ತೀವ್ರ ಅಸ್ವಸ್ಥರಾಗಿ ಪದೇ ಪದೇ ವಾಂತಿ ಮಾಡಲು ಪ್ರಾರಂಭಿಸಿದ್ದಾರೆ. ಮಕ್ಕಳ ಆಕ್ರಂದನ ಹಾಗೂ ದೈಹಿಕ ಸ್ಥಿತಿಯನ್ನು ಕಂಡು ತೀವ್ರ ಆತಂಕಗೊಂಡ ಪೋಷಕರು ತಕ್ಷಣವೇ ದೀಪಗಳನ್ನು ಆನ್ ಮಾಡಿ, ನೆರೆಹೊರೆಯವರನ್ನು ನೆರವಿಗಾಗಿ ಕೂಗಿ ಕರೆದಿದ್ದಾರೆ.
ಸ್ಥಳೀಯರು ಮತ್ತು ಕುಟುಂಬಸ್ಥರು ಸೇರಿ ಇಡೀ ಮನೆಯನ್ನು ಜಾಲಾಡಿದಾಗ, ಕತ್ತಲೆಯಲ್ಲಿ ಹಾವೊಂದು ಮನೆಯೊಳಗೆ ಹರಿದಾಡುತ್ತಿರುವುದು ಪತ್ತೆಯಾಗಿದೆ. ತಕ್ಷಣವೇ ಮಕ್ಕಳಿಬ್ಬರಿಗೂ ಹಾವು ಕಚ್ಚಿರುವುದನ್ನು ಪೋಷಕರು ಖಚಿತಪಡಿಸಿಕೊಂಡಿದ್ದಾರೆ.
ದೇಹಕ್ಕೆ ವಿಷ ವ್ಯಾಪಿಸಿ ತೀವ್ರವಾಗಿ ಅಸ್ವಸ್ಥಗೊಂಡಿದ್ದ ಇಬ್ಬರೂ ಮಕ್ಕಳನ್ನು ತಡಮಾಡದೇ ಶಿರಸಿ ಸರ್ಕಾರಿ ಆಸ್ಪತ್ರೆಗೆ ಸಾಗಿಸಲಾಯಿತು. ಆದರೆ, ಆಸ್ಪತ್ರೆ ತಲುಪುವಷ್ಟರಲ್ಲಿ ಮಿಥನ್ ಸ್ಥಿತಿ ಸಂಪೂರ್ಣ ಹದಗೆಟ್ಟಿದ್ದು, ಆತ ಮಾರ್ಗಮಧ್ಯದಲ್ಲೇ ಕೊನೆಯುಸಿರೆಳೆದಿದ್ದಾನೆ ಎಂದು ವೈದ್ಯರು ತಪಾಸಣೆ ನಡೆಸಿ ಘೋಷಿಸಿದ್ದಾರೆ.
ಸದ್ಯ ತೀವ್ರ ಅಸ್ವಸ್ಥಗೊಂಡಿರುವ ಮೃತ ಬಾಲಕನ ಸಹೋದರಿ ದೀಕ್ಷಾಗೆ ಆಸ್ಪತ್ರೆಯ ಐಸಿಯುನಲ್ಲಿ ತುರ್ತು ಚಿಕಿತ್ಸೆ ನೀಡಲಾಗುತ್ತಿದ್ದು, ಗುಣಮುಖರಾಗಲೆಂದು ಗ್ರಾಮಸ್ಥರು ಪ್ರಾರ್ಥಿಸುತ್ತಿದ್ದಾರೆ. ಮುಗ್ಧ ಬಾಲಕನ ಅಕಾಲಿಕ ನಿಧನದಿಂದ ಸಹಸ್ರಳ್ಳಿ ಗ್ರಾಮದಲ್ಲಿ ಮೌನ ಆವರಿಸಿದ್ದು, ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ.
