ಕಾಸರಗೋಡು:.ಫೈನಾನ್ಸ್ ಏಜೆಂಟ್‌ಗಳಿಂದ ತಪ್ಪಿಸಿಕೊಳ್ಳಲು ನಕಲಿ ನೋಂದಣಿ ಸಂಖ್ಯೆ ಅಳವಡಿಸಿಕೊಂಡು ತಿರುಗಾಡುತ್ತಿದ್ದ ಕಾರು, ಅಕಸ್ಮಾತ್ತಾಗಿ ಅದೇ ನಂಬರ್‌ನ ಮೂಲ ಥಾರ್ ಕಾರಿನ ಪಕ್ಕದಲ್ಲೇ ಬಂದು ನಿಂತು ಸಿಕ್ಕಿಬಿದ್ದಿರುವ ವಿಚಿತ್ರ ಘಟನೆ ಬದಿಯಡ್ಕ ಸಮೀಪ ನಡೆದಿದೆ.

​ಘಟನೆಯ ವಿವರ:

ಬದಿಯಡ್ಕದ ಬೇಲಾ ಕುಂಞಾರ್ ನಿವಾಸಿ ಫಕ್ರುದ್ದೀನ್ ಎಂಬಾತ ಹಾಗೂ ಕಾಸರಗೋಡಿನ ನೆಲ್ಲಿಕುನ್ನು ನಿವಾಸಿ ಉಮ್ಮರ್ ರಶೀದ್ ಎಂಬವರ ಕಪ್ಪು ಬಣ್ಣದ ಮಹೀಂದ್ರಾ ಥಾರ್ ಕಾರುಗಳು ಒಂದೇ ನೋಂದಣಿ ಸಂಖ್ಯೆಯನ್ನು (KL 14 AJ 3008) ಹೊಂದಿರುವುದು ಪತ್ತೆಯಾಗಿದೆ.

​ಸೆಪ್ಟೆಂಬರ್ 12ರಂದು ಮಧ್ಯಾಹ್ನ ಸುಮಾರು 12.30ರ ವೇಳೆಗೆ ಉಪ್ಪಳದ ಕೈಕಂಬದಲ್ಲಿ ಫಕ್ರುದ್ದೀನ್ ತನ್ನ ಥಾರ್ ಕಾರನ್ನು ನಿಲ್ಲಿಸಿದ್ದರು. ಅದೇ ವೇಳೆ ಸಮೀಪದಲ್ಲೇ ಉಮ್ಮರ್ ರಶೀದ್ ಅವರ ಕಾರು ಕೂಡ ನಿಂತಿತ್ತು. ಒಂದೇ ಬಣ್ಣ ಹಾಗೂ ಒಂದೇ ನಂಬರ್ ಹೊಂದಿದ್ದ ಎರಡೂ ಕಾರುಗಳನ್ನು ಕಂಡ ಸ್ಥಳೀಯ ಯುವಕರು ಅನುಮಾನಗೊಂಡು ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

​ಪೊಲೀಸ್ ತನಿಖೆಯಲ್ಲಿ ಸತ್ಯ ಬಹಿರಂಗ:

ಸ್ಥಳಕ್ಕೆ ಆಗಮಿಸಿದ ಮಂಜೇಶ್ವರ ಪೊಲೀಸರು ಎರಡೂ ವಾಹನಗಳನ್ನು ವಶಕ್ಕೆ ಪಡೆದು ದಾಖಲೆಗಳನ್ನು ಪರಿಶೀಲಿಸಿದ್ದಾರೆ. ತನಿಖೆಯ ವೇಳೆ ಉಮ್ಮರ್ ರಶೀದ್ ಅವರ ಕಾರಿಗೆ ‘KL 14 AJ 3008’ ನಂಬರ್ ನಿಜವಾದದ್ದು ಎಂಬುದು ದೃಢಪಟ್ಟಿದೆ. ಆದರೆ, ಫಕ್ರುದ್ದೀನ್ ಅವರ ಥಾರ್ ಕಾರಿನ ನೈಜ ನಂಬರ್ ‘KL 14 AG 2557’ ಆಗಿದ್ದು, ಆತ ನಕಲಿ ನಂಬರ್ ಪ್ಲೇಟ್ ಬಳಸುತ್ತಿದ್ದುದು ಬೆಳಕಿಗೆ ಬಂದಿದೆ.

​ಫೈನಾನ್ಸ್ ಏಜೆಂಟ್‌ಗಳ ಕಣ್ಣು ತಪ್ಪಿಸಲು ಸ್ಕೆಚ್:

ವಾಹನದ ಸಾಲದ ಕಂತು (EMI) ಬಾಕಿ ಇದ್ದಿದ್ದರಿಂದ ಹಣಕಾಸು ಸಂಸ್ಥೆಯ ವಸೂಲಾತಿ ಏಜೆಂಟ್‌ಗಳು ಕಾರನ್ನು ಜಪ್ತಿ ಮಾಡಬಹುದು ಎಂಬ ಭೀತಿಯಿಂದ ಫಕ್ರುದ್ದೀನ್ ಈ ನಕಲಿ ನಂಬರ್ ಪ್ಲೇಟ್ ಅಳವಡಿಸಿಕೊಂಡಿದ್ದಾಗಿ ಪೊಲೀಸರ ಎದುರು ಒಪ್ಪಿಕೊಂಡಿದ್ದಾನೆ. ಆದರೆ, ವಿಧಿಯಾಟವೆಂಬಂತೆ ಅದೇ ನಂಬರ್‌ನ ಮೂಲ ಥಾರ್ ಕಾರಿನ ಪಕ್ಕದಲ್ಲೇ ತನ್ನ ಕಾರು ನಿಲ್ಲಿಸಿ ಸಿಕ್ಕಿಬಿದ್ದಿದ್ದಾನೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ತನಿಖೆ ಮುಂದುವರಿಸಿದ್ದಾರೆ.