ಸಾಲ ವಸೂಲಿ ನೆಪದಲ್ಲಿ ಗ್ರಾಹಕರಿಗೆ ಕಿರುಕುಳ ನೀಡುವುದು, ಬೆದರಿಕೆ ಹಾಕುವುದು ಹಾಗೂ ಮಾನಹಾನಿ ಮಾಡುವುದಕ್ಕೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ಸಂಪೂರ್ಣ ತಡೆ ನೀಡಿದೆ. ಬ್ಯಾಂಕ್ಗಳು ಹಾಗೂ NBFCಗಳು (ಬ್ಯಾಂಕಿಂಗೇತರ ಹಣಕಾಸು ಸಂಸ್ಥೆಗಳು) ನಿಯೋಜಿಸುವ ಸಾಲ ವಸೂಲಿ ಏಜೆಂಟ್ಗಳು (Recovery Agents) ವಸೂಲಿ ಪ್ರಕ್ರಿಯೆಯಲ್ಲಿ ಗ್ರಾಹಕರ ಗೌರವ, ಗೌಪ್ಯತೆ ಮತ್ತು ಕಾನೂನಾತ್ಮಕ ಚೌಕಟ್ಟನ್ನು ಕಡ್ಡಾಯವಾಗಿ ಪಾಲಿಸಬೇಕು ಎಂದು ಆರ್ಬಿಐ ಸ್ಪಷ್ಟಪಡಿಸಿದೆ.
ಬೆದರಿಕೆ ಮತ್ತು ಕಿರುಕುಳ ನಿಷೇಧ: ಸಾಲಗಾರರಿಗೆ ಯಾವುದೇ ರೀತಿಯ ಮಾತಿನ ಅಥವಾ ದೈಹಿಕ ಬೆದರಿಕೆ ಹಾಕುವುದು ಹಾಗೂ ಕಿರುಕುಳ ನೀಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
ಸಾರ್ವಜನಿಕ ಅವಮಾನಕ್ಕೆ ಅವಕಾಶವಿಲ್ಲ: ಸಾಲ ವಸೂಲಿ ಹೆಸರಿನಲ್ಲಿ ಸಾರ್ವಜನಿಕವಾಗಿ ಸಾಲಗಾರರನ್ನು ಅವಮಾನಿಸುವುದು ಅಥವಾ ಅವರ ಮಾನಹಾನಿ ಮಾಡುವಂತಹ ಕ್ರಮಗಳನ್ನು ಕೈಗೊಳ್ಳುವಂತಿಲ್ಲ.
ಕುಟುಂಬ ಹಾಗೂ ಸ್ನೇಹಿತರ ಗೌಪ್ಯತೆ ರಕ್ಷಣೆ: ಸಾಲಗಾರರ ಕುಟುಂಬದ ಸದಸ್ಯರು, ಸ್ನೇಹಿತರು ಅಥವಾ ಅರ್ಜಿ ಸಲ್ಲಿಸುವಾಗ ನೀಡಲಾದ ರೆಫರೆನ್ಸ್ಗಳಿಗೆ (References) ಕಿರುಕುಳ ನೀಡಬಾರದು.
ಸಮಯದ ಮಿತಿ ಪಾಲನೆ: ಬಾಕಿ ಸಾಲ ವಸೂಲಿಗಾಗಿ ಬೆಳಿಗ್ಗೆ 8 ಗಂಟೆಗಿಂತ ಮೊದಲು ಹಾಗೂ ಸಂಜೆ 7 ಗಂಟೆಯ ನಂತರ ಕರೆ ಮಾಡುವುದನ್ನು ನಿಷೇಧಿಸಲಾಗಿದೆ.
ಪದೇಪದೇ ಕರೆ ಮಾಡಿ ಒತ್ತಡ ಹೇರುವಂತಿಲ್ಲ: ನಿರಂತರವಾಗಿ ಕರೆಗಳನ್ನು ಮಾಡುವ ಮೂಲಕ ಸಾಲಗಾರರ ಮೇಲೆ ಮಾನಸಿಕ ಒತ್ತಡ ಹೇರುವಂತಿಲ್ಲ.
ಅನಾಮಧೇಯ ಹಾಗೂ ಬೆದರಿಕೆ ಕರೆಗಳ ನಿಷೇಧ: ಗುರುತು ಮರೆಮಾಚಿ ಕರೆ ಮಾಡುವುದು (Anonymous Calls) ಅಥವಾ ಬೆದರಿಕೆ ಕರೆಗಳನ್ನು ಮಾಡುವುದು ಕಟ್ಟುನಿಟ್ಟಿನ ಅಪರಾಧ.
ಸಾಮಾಜಿಕ ಜಾಲತಾಣಗಳಲ್ಲಿ ಅಸಭ್ಯ ಸಂದೇಶ ನಿಷೇಧ: ಮೊಬೈಲ್, ವಾಟ್ಸಾಪ್ ಅಥವಾ ಸಾಮಾಜಿಕ ಜಾಲತಾಣಗಳ ಮೂಲಕ ಅಸಭ್ಯ ಮತ್ತು ಅನುಚಿತ ಸಂದೇಶಗಳನ್ನು ಕಳುಹಿಸುವುದು ಕಾನೂನುಬಾಹಿರ.
ಸುಳ್ಳು ಹಾಗೂ ದಾರಿತಪ್ಪಿಸುವ ಮಾಹಿತಿ ಬೇಡ: ಸಾಲದ ಮೊತ್ತ, ಪಾವತಿಸದಿದ್ದರೆ ಎದುರಾಗುವ ಕಾನೂನು ಪರಿಣಾಮಗಳು ಅಥವಾ ತಮ್ಮ ಅಧಿಕಾರದ ಕುರಿತು ತಪ್ಪು ಮಾಹಿತಿ ನೀಡಿ ಸಾಲಗಾರರನ್ನು ಹೆದರಿಸುವಂತಿಲ್ಲ.
ಏಜೆಂಟ್ಗಳಿಗೆ ಸೂಕ್ತ ತರಬೇತಿ ಕಡ್ಡಾಯ: ಗ್ರಾಹಕರೊಂದಿಗೆ ಗೌರವ ಹಾಗೂ ಸಂವೇದನಾಶೀಲತೆಯಿಂದ ವರ್ತಿಸುವಂತೆ ಬ್ಯಾಂಕ್ ಮತ್ತು ಹಣಕಾಸು ಸಂಸ್ಥೆಗಳು ತಮ್ಮ ವಸೂಲಿ ಏಜೆಂಟ್ಗಳಿಗೆ ಅಗತ್ಯ ತರಬೇತಿ ನೀಡಬೇಕು.
ಏಜೆಂಟ್ನ ತಪ್ಪಿಗೂ ಸಂಸ್ಥೆಯೇ ಹೊಣೆ: ಸಾಲ ವಸೂಲಿ ಕಾರ್ಯವನ್ನು ಹೊರಗುತ್ತಿಗೆ ನೀಡಿದ್ದರೂ, ಏಜೆಂಟ್ ಮಾಡುವ ಲೋಪದೋಷ ಮತ್ತು ಅಕ್ರಮಗಳಿಗೆ ಸಂಬಂಧಿಸಿದ ಬ್ಯಾಂಕ್ ಅಥವಾ NBFC ಸಂಸ್ಥೆಯೇ ಸಂಪೂರ್ಣ ಜವಾಬ್ದಾರಿಯಾಗುತ್ತದೆ.
ಸಾಲದ ಕಂತು ಬಾಕಿ ಉಳಿದಿದ್ದರೂ ಸಹ, ಬಲಪ್ರಯೋಗ, ಬೆದರಿಕೆ, ಸಾರ್ವಜನಿಕ ಅವಮಾನ ಅಥವಾ ಗೌಪ್ಯತೆಗೆ ಧಕ್ಕೆ ತಂದು ವಸೂಲಿ ಮಾಡಲು ಆರ್ಬಿಐ ಯಾವುದೇ ಕಾರಣಕ್ಕೂ ಅವಕಾಶ ನೀಡುವುದಿಲ್ಲ. ಗ್ರಾಹಕರು ಇಂತಹ ಕಿರುಕುಳ ಎದುರಿಸಿದರೆ ಸಂಬಂಧಪಟ್ಟ ಬ್ಯಾಂಕ್ ಅಥವಾ ಆರ್ಬಿಐನ ಒಂಬುಡ್ಸ್ಮನ್ಗೆ ದೂರು ಸಲ್ಲಿಸಬಹುದು.
