ಹೈದರಾಬಾದ್: ಸೈಬರ್ ಅಪರಾಧಗಳ ಜಾಲವನ್ನು ಬೇರುಸಹಿತ ಕಿತ್ತೆಸೆಯಲು ಹೈದರಾಬಾದ್ ಪೊಲೀಸರು ನಡೆಸಿದ ಬೃಹತ್ ಕಾರ್ಯಾಚರಣೆ ‘ಆಪರೇಷನ್ ಆಕ್ಟೋಪಸ್ 2.0’ ಭರ್ಜರಿ ಯಶಸ್ಸು ಕಂಡಿದೆ. ವಂಚಕರಿಗೆ ಅಕ್ರಮವಾಗಿ ಸಾಥ್ ನೀಡುತ್ತಿದ್ದ ವಿವಿಧ ಪ್ರಮುಖ ಬ್ಯಾಂಕುಗಳ 32 ಅಧಿಕಾರಿಗಳು ಸೇರಿದಂತೆ ಒಟ್ಟು 52 ಮಂದಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸ್ ಆಯುಕ್ತ ವಿ.ಸಿ. ಸಜ್ಜನರ್ ಮಾಹಿತಿ ನೀಡಿದ್ದಾರೆ.

​9 ರಾಜ್ಯಗಳಲ್ಲಿ ಏಕಕಾಲಕ್ಕೆ ದಾಳಿ:

ಕಳೆದ ಏಳು ದಿನಗಳಿಂದ ಹದಿನಾರು ವಿಶೇಷ ಪೊಲೀಸ್ ತಂಡಗಳು ಕರ್ನಾಟಕ, ಮಹಾರಾಷ್ಟ್ರ, ದೆಹಲಿ ಸೇರಿದಂತೆ ಒಟ್ಟು ಒಂಬತ್ತು ರಾಜ್ಯಗಳಲ್ಲಿ ಮಿಂಚಿನ ಕಾರ್ಯಾಚರಣೆ ನಡೆಸಿದ್ದವು. ಈ ವೇಳೆ ಸೈಬರ್ ವಂಚನೆಗೆ ನೆರವಾಗುತ್ತಿದ್ದ ದೊಡ್ಡ ಜಾಲವನ್ನೇ ಪೊಲೀಸರು ಭೇದಿಸಿದ್ದಾರೆ.

ಬಂಧಿತ 32 ಬ್ಯಾಂಕ್ ಅಧಿಕಾರಿಗಳಲ್ಲಿ ಪ್ರಮುಖ ಖಾಸಗಿ ಮತ್ತು ಸಾರ್ವಜನಿಕ ವಲಯದ ಬ್ಯಾಂಕುಗಳ ಸಿಬ್ಬಂದಿ ಸೇರಿದ್ದಾರೆ:

​ಇಂಡಸ್‌ಇಂಡ್ ಬ್ಯಾಂಕ್: 06 ಅಧಿಕಾರಿಗಳು

​ಬಂಧನ್ ಬ್ಯಾಂಕ್: 05 ಅಧಿಕಾರಿಗಳು

​ಬ್ಯಾಂಕ್ ಆಫ್ ಬರೋಡಾ: 05 ಅಧಿಕಾರಿಗಳು

​ಫೆಡರಲ್ ಮತ್ತು ಐಡಿಎಫ್‌ಸಿ ಫಸ್ಟ್ ಬ್ಯಾಂಕ್: ತಲಾ 04 ಅಧಿಕಾರಿಗಳು

​ಕರ್ನಾಟಕ ಬ್ಯಾಂಕ್: 02 ಅಧಿಕಾರಿಗಳು

ಮತ್ತಿತರ ಬ್ಯಾಂಕುಗಳ ಸಿಬ್ಬಂದಿಯನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಲಾಗಿದೆ.

ಸೈಬರ್ ಅಪರಾಧಿಗಳು ಜನರನ್ನು ವಂಚಿಸಿ ಲೂಟಿ ಮಾಡಿದ ಹಣವನ್ನು ಸುರಕ್ಷಿತವಾಗಿ ವರ್ಗಾಯಿಸಲು ‘ಮ್ಯೂಲ್ ಖಾತೆ’ಗಳನ್ನು (ಬಾಡಿಗೆ ಖಾತೆಗಳು) ಬಳಸುತ್ತಿದ್ದರು. ಈ ಬ್ಯಾಂಕ್ ಅಧಿಕಾರಿಗಳು ಉದ್ದೇಶಪೂರ್ವಕವಾಗಿ ಕೆವೈಸಿ (KYC) ನಿಯಮಗಳನ್ನು ಗಾಳಿಗೆ ತೂರಿ, ಯಾವುದೇ ಸರಿಯಾದ ದಾಖಲೆಗಳ ಪರಿಶೀಲನೆ ನಡೆಸದೆ ಇಂತಹ ನಕಲಿ ಖಾತೆಗಳನ್ನು ತೆರೆಯಲು ಅವಕಾಶ ಮಾಡಿಕೊಟ್ಟಿದ್ದರು. ಈ ಖಾತೆಗಳ ಮೂಲಕ ಸರಿಸುಮಾರು 150 ಕೋಟಿ ರೂಪಾಯಿಗಳಿಗೂ ಹೆಚ್ಚು ಅಕ್ರಮ ವಹಿವಾಟು ನಡೆದಿರುವುದು ತನಿಖೆಯಲ್ಲಿ ದೃಢಪಟ್ಟಿದೆ.

ಪೊಲೀಸರು ದಾಳಿಯ ವೇಳೆ 26 ಮೊಬೈಲ್ ಫೋನ್‌ಗಳು, 14 ಚೆಕ್ ಪುಸ್ತಕಗಳು, 21 ಶೆಲ್ ಕಂಪನಿಗಳ ಅಂಚೆಚೀಟಿಗಳು ಹಾಗೂ ಲ್ಯಾಪ್‌ಟಾಪ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ. ಅಲ್ಲದೆ, ಹಣ ವರ್ಗಾವಣೆಗೆ ಅನುಕೂಲ ಮಾಡಿಕೊಟ್ಟಿದ್ದ 15 ಮ್ಯೂಲ್ ಖಾತೆದಾರರು ಹಾಗೂ 5 ಪೂರೈಕೆದಾರರನ್ನು ಸಹ ಸೆರೆಹಿಡಿಯಲಾಗಿದೆ.

ಖಾಸಗಿ ಬ್ಯಾಂಕುಗಳಲ್ಲಿ ಕೆವೈಸಿ ಪರಿಶೀಲನಾ ಪ್ರಕ್ರಿಯೆಯಲ್ಲಿನ ಲೋಪಗಳನ್ನೇ ಸೈಬರ್ ಅಪರಾಧಿಗಳು ಬಂಡವಾಳ ಮಾಡಿಕೊಳ್ಳುತ್ತಿದ್ದಾರೆ. ಹೂಡಿಕೆ ವಂಚನೆ ಹಾಗೂ ಇತ್ತೀಚೆಗೆ ಹೆಚ್ಚಾಗುತ್ತಿರುವ ‘ಡಿಜಿಟಲ್ ಅರೆಸ್ಟ್’ ಹಗರಣಗಳ ಬಗ್ಗೆ ಸಾರ್ವಜನಿಕರು ಅತ್ಯಂತ ಎಚ್ಚರಿಕೆಯಿಂದ ಇರಬೇಕು,” ಎಂದು ಆಯುಕ್ತ ಸಜ್ಜನರ್ ಅವರು ತಿಳಿಸಿದ್ದಾರೆ.

​ಈ ಹಿಂದೆ ಫೆಬ್ರವರಿ 2026 ರಲ್ಲಿ ನಡೆದ ‘ಆಪರೇಷನ್ ಆಕ್ಟೋಪಸ್-1’ ರಲ್ಲಿ ಸಿಕ್ಕ ಸುಳಿವುಗಳ ಆಧಾರದ ಮೇಲೆ ಈ ಎರಡನೇ ಹಂತದ ಕಾರ್ಯಾಚರಣೆಯನ್ನು ಯಶಸ್ವಿಯಾಗಿ ನಡೆಸಲಾಗಿದೆ.