ಬೆಂಗಳೂರು: ಮೆಟ್ರೋ ರೈಲಿನಲ್ಲಿ ಪ್ರತಿದಿನ ಲಕ್ಷಾಂತರ ಜನರು ತಮ್ಮದೇ ಲೋಕದಲ್ಲಿ ಪ್ರಯಾಣಿಸುತ್ತಿರುತ್ತಾರೆ. ಕೆಲವರು ಮೊಬೈಲ್‌ನಲ್ಲಿ ಬ್ಯುಸಿಯಾಗಿದ್ದರೆ, ಇನ್ನು ಕೆಲವರು ಪುಸ್ತಕ ಓದುವುದರಲ್ಲಿ ತಲ್ಲೀನರಾಗಿರುತ್ತಾರೆ. ಆದರೆ, ಇತ್ತೀಚೆಗೆ ನಮ್ಮ ನಮ್ಮ ಮೆಟ್ರೋ ಪ್ರಯಾಣದ ವೇಳೆ ಯುವತಿಯೊಬ್ಬಳು ಕೈಯಲ್ಲಿ ಹಿಡಿದಿದ್ದ ಪುಸ್ತಕದ ವಿಲಕ್ಷಣ ಶೀರ್ಷಿಕೆ (ಟೈಟಲ್) ಕಂಡು ಸುತ್ತಮುತ್ತಲಿದ್ದ ಪ್ರಯಾಣಿಕರೆಲ್ಲಾ ಒಂದು ಕ್ಷಣ ಶಾಕ್ ಆದ ಘಟನೆ ನಡೆದಿದೆ.

​ಆಕೆ ಹಿಡಿದಿದ್ದ ಪುಸ್ತಕದ ಹೆಸರು ಬೇರೇನೂ ಅಲ್ಲ… “How to Kill Men and Get Away With It” (ಪುರುಷರನ್ನು ಕೊಲ್ಲುವುದು ಹೇಗೆ ಮತ್ತು ಅದರಿಂದ ಪಾರಾಗುವುದು ಹೇಗೆ!).

ಮೆಟ್ರೋದಲ್ಲಿ ಯುವತಿಯ ಎದುರು ಕುಳಿತಿದ್ದ ಪ್ರಯಾಣಿಕರೊಬ್ಬರು ಈ ವಿಲಕ್ಷಣ ದೃಶ್ಯವನ್ನು ಗಮನಿಸಿ, ಫೋಟೋ ತೆಗೆದು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಮೊದಲ ನೋಟಕ್ಕೆ ಈ ಆಘಾತಕಾರಿ ಶೀರ್ಷಿಕೆಯನ್ನು ನೋಡಿ ಸಹಪ್ರಯಾಣಿಕರಲ್ಲಿ “ಈಕೆ ನಿಜವಾಗಿಯೂ ಅಂತಹದ್ದೇನನ್ನಾದರೂ ಪ್ಲಾನ್ ಮಾಡುತ್ತಿದ್ದಾಳಾ? ಮುಂದಿನ ಟಾರ್ಗೆಟ್ ಯಾರು?” ಎಂಬ ನಡುಕ ಹಾಗೂ ಅನುಮಾನ ಶುರುವಾಗಿದೆ. ಸದ್ಯ ಈ ಘಟನೆಯ ಫೋಟೋ ಇಂಟರ್‌ನೆಟ್‌ನಲ್ಲಿ ಭಾರಿ ವೈರಲ್ ಆಗುತ್ತಿದ್ದು, ನೆಟ್ಟಿಗರ ಗಮನ ಸೆಳೆದಿದೆ.

ಆದರೆ, ಈ ಕಥೆಯ ಹಿಂದಿನ ಅಸಲಿಯತ್ತೇ ಬೇರೆಯಾಗಿದೆ. ಇದು ನಿಜ ಜೀವನದಲ್ಲಿ ಪುರುಷರನ್ನು ಕೊಲ್ಲುವ ಐಡಿಯಾ ಕೊಡುವ ಯಾವುದೇ ‘ಕ್ರಿಮಿನಲ್ ಗೈಡ್’ ಅಥವಾ ಕಾನೂನುಬಾಹಿರ ಪುಸ್ತಕವಲ್ಲ!

​ಕಾಲ್ಪನಿಕ ಕಾದಂಬರಿ: ಇದು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಅತ್ಯಂತ ಪ್ರಸಿದ್ಧಿಯಾಗಿರುವ ಒಂದು ಕ್ರೈಮ್-ಥ್ರಿಲ್ಲರ್ ಫಿಕ್ಷನ್ ಕಾದಂಬರಿಯಾಗಿದೆ (Crime-Thriller Fiction Novel).

​ಲೇಖಕಿ: ಮೈಕಾ ಗಿಬ್ಸನ್ ಅವರು ಬರೆದಿರುವ ಈ ಸಸ್ಪೆನ್ಸ್ ಕಾದಂಬರಿ ಸಂಪೂರ್ಣ ಕಾಲ್ಪನಿಕ ಕಥೆಯನ್ನೊಳಗೊಂಡ ಮನರಂಜನಾ ಪುಸ್ತಕವಷ್ಟೇ ಹೊರತು, ನಿಜ ಜೀವನದ ಘಟನೆಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ.

ಇಂಗ್ಲಿಷ್‌ನಲ್ಲಿ “Don’t judge a book by its cover” (ಪುಸ್ತಕದ ಮುಖಪುಟ ನೋಡಿ ಅದರ ಒಳಗಿನ ವಿಷಯವನ್ನು ಅಳೆಯಬೇಡಿ) ಎಂಬ ಜನಪ್ರಿಯ ಗಾದೆಯಿದೆ. ಈ ಮೆಟ್ರೋ ಘಟನೆ ಅದಕ್ಕೆ ಅತ್ಯುತ್ತಮ ಉದಾಹರಣೆಯಾಗಿದೆ. ಹಲವು ಬಾರಿ ಕೆಲವು ಕಾದಂಬರಿಗಳ ಶೀರ್ಷಿಕೆಗಳು ಸಾರ್ವಜನಿಕರ ಗಮನ ಸೆಳೆಯಲು ವಿಚಿತ್ರ ಹಾಗೂ ಆಘಾತಕಾರಿಯಾಗಿರುತ್ತವೆ. ಪೂರ್ತಿ ವಿಷಯ ತಿಳಿಯದೆ ತಪ್ಪು ತಿಳುವಳಿಕೆ ಮೂಡುವುದು ಸಹಜ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದ್ದು, ಸದ್ಯ ಈ ಕ್ರಿಯೇಟಿವ್ ಬುಕ್ ಟೈಟಲ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.