ಧಾರ್ಮಿಕ ಜಗತ್ತು: ಭಗವಾನ್ ಶಿವನ ಸಾಕ್ಷಾತ್ಕಾರ ಮತ್ತು ದರ್ಶನ ಪಡೆಯಬೇಕು ಎಂಬ ಏಕೈಕ ಮಹದಾಸೆಯಿಂದ ಹಿಂದೂ ತಪಸ್ವಿಯೊಬ್ಬರು ಕಳೆದ 12 ವರ್ಷಗಳಿಂದ ನಿಂತುಕೊಂಡೇ ಕಠಿಣ ತಪಸ್ಸು ಆಚರಿಸುತ್ತಿರುವ ಅಪರೂಪದ ಹಾಗೂ ವಿಸ್ಮಯಕಾರಿ ಘಟನೆ ಬೆಳಕಿಗೆ ಬಂದಿದೆ.

​ನಾಗಾ ಸಾಧು ಪಂಥಕ್ಕೆ ಸೇರಿದ ‘ಖರೇಶ್ವರಿ ಬಾಬಾ’ ಎಂದೇ ಪ್ರಖ್ಯಾತರಾಗಿರುವ ದೂಲಾಲ್ ಗಿರಿ ಜಿ ಮಹಾರಾಜ್ ಅವರೇ ಈ ಕಠಿಣ ಜೀವಿತಾವಧಿ ವ್ರತ ಕೈಗೊಂಡಿರುವ ವಿಲಕ್ಷಣ ಸಾಧು.

ಮಾಹಿತಿಗಳ ಪ್ರಕಾರ, ದೂಲಾಲ್ ಗಿರಿ ಜಿ ಮಹಾರಾಜ್ ಅವರು ಆಧ್ಯಾತ್ಮ ಹಾಗೂ ತಪಸ್ಸಿನ ಜೀವನದ ಕಡೆಗೆ ಆಕರ್ಷಿತರಾಗಿ ತಮ್ಮ ಶಿಕ್ಷಣವನ್ನು ಅರ್ಧಕ್ಕೇ ಮೊಟಕುಗೊಳಿಸಿದ್ದರು. ಭಗವಂತನ ಸಾಕ್ಷಾತ್ಕಾರಕ್ಕಾಗಿ ಸಾಧುಗಳ ನಿರ್ದಿಷ್ಟ ಪಂಥದ ಆಚರಣೆಯಾದ ‘ಖರೇಶ್ವರಿ’ (ಸ್ಟ್ಯಾಂಡಿಂಗ್ ಬಾಬಾ) ವ್ರತವನ್ನು ಇವರು ಕೈಗೊಂಡಿದ್ದಾರೆ. ಈ ವ್ರತದ ನಿಯಮದಂತೆ ಸಾಧುಗಳು ಎಂದಿಗೂ ನೆಲದ ಮೇಲೆ ಕುಳಿತುಕೊಳ್ಳುವಂತಿಲ್ಲ ಮತ್ತು ಮಲಗುವಂತಿಲ್ಲ.

ಕಳೆದ 12 ವರ್ಷಗಳಿಂದ ನಿರಂತರವಾಗಿ ನಿಂತುಕೊಂಡೇ ಇರುವ ಇವರು, ಇತ್ತೀಚಿನ ದಿನಗಳಲ್ಲಿ ದೇಹಕ್ಕೆ ಸ್ವಲ್ಪ ವಿಶ್ರಾಂತಿ ನೀಡಲು ಪ್ರತ್ಯೇಕವಾಗಿ ಸಿದ್ಧಪಡಿಸಲಾದ, ಮೇಲಿನಿಂದ ತೂಗಾಡುವ ಬೆಲ್ಟ್ ಮಾದರಿಯ ಆಸರೆಯನ್ನು ಬಳಸುತ್ತಿದ್ದಾರೆ. ಈ ಬೆಲ್ಟ್ ಮೇಲೆ ದೇಹವನ್ನು ಒರಗಿಸಿ ನಿಂತ ಸ್ಥಿತಿಯಲ್ಲೇ ಅವರು ವಿಶ್ರಾಂತಿ ಪಡೆಯುತ್ತಾರೆ.

ಹಲವು ವರ್ಷಗಳಿಂದ ನಿರಂತರವಾಗಿ ದೇಹದ ಸಂಪೂರ್ಣ ಭಾರ ಕಾಲುಗಳ ಮೇಲೆಯೇ ಬೀಳುತ್ತಿರುವುದರಿಂದ, ಬಾಬಾ ಅವರ ಕಾಲುಗಳಲ್ಲಿ ತೀವ್ರವಾದ ಊತ ಕಾಣಿಸಿಕೊಂಡಿದ್ದು, ಗಂಭೀರ ಆರೋಗ್ಯ ಸಮಸ್ಯೆಗಳು ಉದ್ಭವಿಸಿವೆ. ಪ್ರಸ್ತುತ ಇವರ ಯೋಗಕ್ಷೇಮ ಮತ್ತು ಸೇವೆಗಾಗಿ ಕೆಲ ಸ್ವಯಂಸೇವಕರು ನಿಯೋಜಿತರಾಗಿದ್ದಾರೆ. ಸ್ವಯಂಸೇವಕರು ಬಾಬಾ ಅವರ ಕಾಲುಗಳಿಗೆ ನಿಯಮಿತವಾಗಿ ಸೋಂಕು ನಿವಾರಕ ಮುಲಾಮುಗಳನ್ನು ಹಚ್ಚಿ, ಬ್ಯಾಂಡೇಜ್ ಕಟ್ಟುವ ಮೂಲಕ ಕಾಲಿನ ಆರೋಗ್ಯವನ್ನು ನೋಡಿಕೊಳ್ಳುತ್ತಿದ್ದಾರೆ.

ಹಿಂದೂ ಸಾಧುಗಳ ಪರಂಪರೆಯಲ್ಲಿ ಕಠಿಣ ಶಾರೀರಿಕ ಕಷ್ಟಗಳನ್ನು ಅನುಭವಿಸುವ ಮೂಲಕ ದೇವರನ್ನು ಒಲಿಸಿಕೊಳ್ಳುವ ಹಲವು ಮಾರ್ಗಗಳಿವೆ. ಅದರಲ್ಲಿ ಈ ‘ಖರೇಶ್ವರಿ’ ಅಥವಾ ‘ಸ್ಟ್ಯಾಂಡಿಂಗ್ ಬಾಬಾ’ ಆಚರಣೆಯೂ ಒಂದಾಗಿದ್ದು, ಈ ಪಂಥದ ಸಾಧುಗಳು ವರ್ಷಗಟ್ಟಲೆ ನಿಂತಲ್ಲೇ ದೇವ ಆರಾಧನೆ ಮಾಡುವುದು ಇವರ ವೈಶಿಷ್ಟ್ಯವಾಗಿದೆ.