ಬೆಂಗಳೂರು: ಪಟಾಕಿ ಕೊಡಿಸುವುದಾಗಿ ನೆರೆಮನೆಯ 13 ವರ್ಷದ ಬಾಲಕನನ್ನು ಕಾರಿನಲ್ಲಿ ಕರೆದೊಯ್ದು, ಹಣಕ್ಕಾಗಿ ಬೇಡಿಕೆಯಿಟ್ಟು ಬಳಿಕ ಭೀಕರವಾಗಿ ಕೊಲೆ ಮಾಡಿರುವ ಆಘಾತಕಾರಿ ಘಟನೆ ಯಲಹಂಕದ ವಿನಾಯಕ ನಗರದಲ್ಲಿ ನಡೆದಿದೆ.

​ಯಲಹಂಕದ ವಿನಾಯಕ ನಗರ ನಿವಾಸಿ ಪ್ರಜ್ವಲ್ (13) ಕೊಲೆಯಾದ ದುರ್ದೈವಿ ಬಾಲಕ. ನೆರೆಮನೆಯ ನಿವಾಸಿ ಭಾಸ್ಕರ್ ರೆಡ್ಡಿ ಎಂಬಾತನೇ ಈ ಕೃತ್ಯ ಎಸಗಿದ ಸೈಕೋ ಕಿಲ್ಲರ್.

​ಹಣಕ್ಕಾಗಿ ಬೆದರಿಕೆ – ರಕ್ತಪಿಪಾಸುಗಳ ಅಮಾನವೀಯ ಕೃತ್ಯ:

ಸಂಜೆ ವೇಳೆ ಪಟಾಕಿ ತರೋಣ ಬಾ ಎಂದು ನಂಬಿಸಿ ಭಾಸ್ಕರ್ ರೆಡ್ಡಿ ಬಾಲಕ ಪ್ರಜ್ವಲ್‌ನನ್ನು ತನ್ನ ಕಾರಿನಲ್ಲಿ ಕರೆದೊಯ್ದಿದ್ದ. ಬಳಿಕ ಬಾಲಕನಿಂದ ವಿಡಿಯೋ ಮಾಡಿಸಿ, ಆತನ ಪೋಷಕರಿಗೆ ಹಣಕ್ಕಾಗಿ ಬೆದರಿಕೆ ಹಾಕಿದ್ದ. ಈ ನಡುವೆ ಮಗುವಿಗಾಗಿ ಹುಡುಕಾಟ ನಡೆಸುತ್ತಿದ್ದ ಪೋಷಕರು ಆರೋಪಿ ಭಾಸ್ಕರ್ ರೆಡ್ಡಿಯ ತಂದೆಗೆ ವಿಷಯ ತಿಳಿಸಿದ್ದರು. ಇಬ್ಬರೂ ಸೇರಿ ಬಾಲಕನನ್ನು ಕ್ಷೇಮವಾಗಿ ಕರೆತರುವಂತೆ ವಾರ್ನಿಂಗ್ ಮಾಡಿದ್ದರಿಂದ, ಪರಿಚಯದವನೇ ಆಗಿದ್ದರಿಂದ ಪೋಷಕರು ಬರುವ ನಿರೀಕ್ಷೆಯಲ್ಲಿದ್ದರು.

​ಆದರೆ, ಕಾರಿನಲ್ಲಿದ್ದ ಆರೋಪಿ ಭಾಸ್ಕರ್ ರೆಡ್ಡಿ ಹಾಗೂ ಆತನ ಜೊತೆಯಲ್ಲಿದ್ದ ಏಡುಕುಂಡಲರೆಡ್ಡಿ ಎಂಬಾತ ಬಾಲಕನ ಕೈ-ಕಾಲು ಮತ್ತು ಬಾಯಿಗೆ ಟೇಪ್ ಸುತ್ತಿ ಹಲ್ಲೆ ನಡೆಸಿದ್ದಾರೆ. ಬಳಿಕ ನಿರ್ಜನ ಪ್ರದೇಶದ ಕಾಂಪೌಂಡ್ ಒಂದರ ಒಳಗೆ ಎಸೆದಿದ್ದಾರೆ. ಆ ವೇಳೆ ಬಾಲಕ ‘ಅಮ್ಮಾ ಅಮ್ಮಾ’ ಎಂದು ನರಳಾಡುತ್ತಿದ್ದರೂ ಕರುಣೆ ತೋರದೆ, ಆತನ ಮುಖ ಮತ್ತು ತಲೆಯ ಮೇಲೆ ಹ್ಯಾಲೋಬ್ರಿಕ್ (ಸಿಮೆಂಟ್ ಸ್ಲ್ಯಾಬ್) ಎತ್ತಿಹಾಕಿ ಬರ್ಬರವಾಗಿ ಹತ್ಯೆ ಮಾಡಿದ್ದಾರೆ.

​ಅಪಘಾತದ ನಾಟಕ – ಪೊಲೀಸರ ಕೈಗೆ ಲಾಕ್:

ಹತ್ಯೆಯ ಬಳಿಕ ಮೃತದೇಹವನ್ನು ಹೂಳಲು ಸಾಧ್ಯವಾಗದೆ, ಕಾರಿನ ಡಿಕ್ಕಿಯಲ್ಲೇ ಇಟ್ಟುಕೊಂಡು ಆಂಧ್ರಪ್ರದೇಶದತ್ತ ಪರಾರಿಯಾಗಲು ಯತ್ನಿಸಿದ್ದಾರೆ. ಈ ವೇಳೆ ಗಾಬರಿಯಲ್ಲಿ ಚಿಕ್ಕಜಾಲ ಸರ್ವೀಸ್ ರಸ್ತೆಯಲ್ಲಿ ಸ್ವಿಫ್ಟ್ ಕಾರು ಹಾಗೂ ಫುಟ್‌ಪಾತ್‌ಗೆ ಡಿಕ್ಕಿ ಹೊಡೆದು ಸರಣಿ ಅಪಘಾತ ಎಸಗಿದ್ದಾರೆ. ಸ್ಥಳೀಯರು ಆರೋಪಿಯನ್ನು ತಡೆದು ನಿಲ್ಲಿಸಿದ್ದು, ಸ್ಥಳಕ್ಕಾಗಮಿಸಿದ ಚಿಕ್ಕಜಾಲ ಠಾಣೆ ಪೊಲೀಸರು ಕಾರಿನ ಡಿಕ್ಕಿ ಪರಿಶೀಲಿಸಿದಾಗ ಬಾಲಕನ ಶವ ಪತ್ತೆಯಾಗಿದೆ.

​ಆರಂಭದಲ್ಲಿ ಬಾಲಕ ಕಾರಿಗೆ ಅಡ್ಡಬಂದು ಅಪಘಾತದಿಂದ ಮೃತಪಟ್ಟಿದ್ದಾನೆ ಎಂದು ಆರೋಪಿ ನಾಟಕವಾಡಲು ಯತ್ನಿಸಿದ್ದ. ಆದರೆ ಪೊಲೀಸರ ತೀವ್ರ ವಿಚಾರಣೆ ಹಾಗೂ ಪ್ರಾಥಮಿಕ ತನಿಖೆಯಲ್ಲಿ ಇದು ಹಣಕ್ಕಾಗಿ ನಡೆದಿರುವ ಪಕ್ಕಾ ಪ್ಲ್ಯಾನ್ಡ್ ಕೊಲೆ ಎಂಬುದು ಬಯಲಾಗಿದೆ.

​ಸದ್ಯ ಮುಖ್ಯ ಆರೋಪಿ ಭಾಸ್ಕರ್ ರೆಡ್ಡಿಯನ್ನು ಚಿಕ್ಕಜಾಲ ಪೊಲೀಸರು ಬಂಧಿಸಿದ್ದು, ತಲೆಮರೆಸಿಕೊಂಡಿರುವ ಮತ್ತೊಬ್ಬ ಆರೋಪಿ ಏಡುಕುಂಡಲ ರೆಡ್ಡಿಗಾಗಿ ಜಾಲ ಬೀಸಿದ್ದಾರೆ.