ವೈದ್ಯಕೀಯ ಶಿಕ್ಷಣ ಹಾಗೂ ಸಂಶೋಧನೆಗಾಗಿ ದಾನವಾಗಿ ಬರುವ ಮೃತದೇಹಗಳ (ಶವಗಳ) ಖಾಸಗಿ ಅಂಗಗಳ ಬಗ್ಗೆ ಕಾಮಿಡಿ ಶೋ ಒಂದರಲ್ಲಿ ಅತ್ಯಂತ ವಿವಾದಾತ್ಮಕ ಹಾಗೂ ಅವಹೇಳನಕಾರಿ ಕಾಮೆಂಟ್ ಮಾಡಿ ಭಾರಿ ಸಾರ್ವಜನಿಕ ಆಕ್ರೋಶಕ್ಕೆ ಈಡಾಗಿದ್ದ ಮುಂಬೈನ ಪ್ರಸಿದ್ಧ ಕೆಇಎಂ (KEM) ಆಸ್ಪತ್ರೆಯ ವೈದ್ಯೆ ಸೇಜಲ್ ಪವಾರ್ ಕೊನೆಗೂ ಮಣಿದಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಟೀಕೆ ವ್ಯಕ್ತವಾದ ಬೆನ್ನಲ್ಲೇ ಅವರು ಸಾರ್ವಜನಿಕವಾಗಿ ಕ್ಷಮೆಯಾಚಿಸಿದ್ದಾರೆ.

ಹಾಸ್ಯನಟ ಪ್ರಣೀತ್ ಮೋರೆ ಅವರ ಸ್ಟ್ಯಾಂಡ್ ಅಪ್ ಕಾಮಿಡಿ ಶೋ ವೇಳೆ ಪ್ರೇಕ್ಷಕರ ಗ್ಯಾಲರಿಯಲ್ಲಿ ಕುಳಿತಿದ್ದ ವೈದ್ಯೆ ಸೇಜಲ್ ಪವಾರ್ ಅವರೊಂದಿಗೆ ಸಂವಾದ ನಡೆದಿತ್ತು. ಈ ವೇಳೆ “ಶವಪರೀಕ್ಷೆ ಮತ್ತು ಮೃತದೇಹಗಳೊಂದಿಗೆ ಕೆಲಸ ಮಾಡುವಾಗ ವೈದ್ಯರು ಗಂಭೀರವಾಗಿರುತ್ತಾರಾ ಅಥವಾ ಜೋಕ್ ಮಾಡುತ್ತಾರಾ?” ಎಂದು ಹಾಸ್ಯನಟ ಪ್ರಶ್ನಿಸಿದ್ದನು. ಇದಕ್ಕೆ ಉತ್ತರಿಸಿದ ವೈದ್ಯೆ ಸೇಜಲ್, “ವೈದ್ಯಕೀಯ ಶಿಕ್ಷಣದ ಅಂಗರಚನಾ ಶಾಸ್ತ್ರದ (Anatomy) ಅಧ್ಯಯನ ನೆನಪಿಸಿಕೊಂಡು, ತಾವು ಮತ್ತು ತಮ್ಮ ಸಹೋದ್ಯೋಗಿಗಳು ಪುರುಷ ಶವಗಳ ಖಾಸಗಿ ಅಂಗಗಳ ಗಾತ್ರವನ್ನು ಪರಸ್ಪರ ಹೋಲಿಕೆ ಮಾಡುತ್ತಿದ್ದೆವು” ಎಂದು ನಗುತ್ತಾ ಅಸಭ್ಯವಾಗಿ ಮಾತನಾಡಿದ್ದರು.

ನೈತಿಕತೆಯ ಉಲ್ಲಂಘನೆ: ವೈದ್ಯಕೀಯ ಸಂಶೋಧನೆ ಮತ್ತು ವಿದ್ಯಾರ್ಥಿಗಳ ವಿದ್ಯಾಭ್ಯಾಸಕ್ಕಾಗಿ ಸಾರ್ವಜನಿಕರು ತಮ್ಮ ದೇಹವನ್ನು ದಾನ ಮಾಡುತ್ತಾರೆ. ಅಂತಹ ಪವಿತ್ರ ಮೃತದೇಹಗಳಿಗೆ ಕನಿಷ್ಠ ಗೌರವ ನೀಡದೇ ಈ ರೀತಿ ಸಾರ್ವಜನಿಕವಾಗಿ ಅವಹೇಳನ ಮಾಡುವುದು ವೈದ್ಯಕೀಯ ವೃತ್ತಿ ನೈತಿಕತೆಗೆ ವಿರುದ್ಧವಾದುದು ಎಂದು ಹಲವು ಹಿರಿಯ ವೈದ್ಯರು ಕಿಡಿಕಾರಿದ್ದಾರೆ.

​ದೇಹ ದಾನಿಗಳ ನಂಬಿಕೆಗೆ ದ್ರೋಹ: ಇಂತಹ ಬೇಜವಾಬ್ದಾರಿ ಮತ್ತು ಪೋಲಿ ಹೇಳಿಕೆಗಳು ಸಮಾಜದಲ್ಲಿ ಅಂಗಾಂಗ ಮತ್ತು ದೇಹ ದಾನ ಮಾಡಲು ಮುಂದೆ ಬರುವ ಸಾರ್ವಜನಿಕರ ನಂಬಿಕೆಯನ್ನು ಹುಸಿಗೊಳಿಸುತ್ತವೆ ಎಂಬ ಆತಂಕವೂ ವ್ಯಕ್ತವಾಗಿದೆ.

ವಿವಾದ ತಾರಕಕ್ಕೇರುತ್ತಿದ್ದಂತೆ ಎಚ್ಚೆತ್ತುಕೊಂಡ ವೈದ್ಯೆ ಸೇಜಲ್ ಪವಾರ್, ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಸುದೀರ್ಘ ಸ್ಪಷ್ಟನೆ ನೀಡಿ ಕ್ಷಮೆ ಕೇಳಿದ್ದಾರೆ.

​”ವಿಡಿಯೋವನ್ನು ಮತ್ತೊಮ್ಮೆ ನೋಡಿದಾಗ ಜನರು ಯಾಕೆ ಕೋಪಗೊಂಡಿದ್ದಾರೆ ಎಂಬುದು ನನಗೆ ಅರ್ಥವಾಯಿತು. ವಿಷಯವು ಅತ್ಯಂತ ಸೂಕ್ಷ್ಮವಾಗಿದ್ದು, ನನ್ನ ಮಾತುಗಳು ತಪ್ಪು ಸಂದೇಶ ರವಾನಿಸಿವೆ. ನಾನು ನನ್ನ ಹೇಳಿಕೆಯನ್ನು ಸಮರ್ಥಿಸಿಕೊಳ್ಳುವುದಿಲ್ಲ. ಯಾರಿಗೂ ಅಗೌರವ ತೋರುವ ಉದ್ದೇಶ ನನಗಿರಲಿಲ್ಲ. ಆದರೂ ನನ್ನ ಮಾತುಗಳಿಂದ ಉಂಟಾದ ಪರಿಣಾಮಕ್ಕೆ ನಾನು ಸಂಪೂರ್ಣ ಹೊಣೆಯಾಗುತ್ತೇನೆ. ಇದನ್ನು ಒಂದು ಪಾಠವಾಗಿ ಸ್ವೀಕರಿಸಿದ್ದು, ಇದರಿಂದ ಯಾರಿಗಾದರೂ ಬೇಸರವಾಗಿದ್ದರೆ ಕ್ಷಮೆಯಾಚಿಸುತ್ತೇನೆ” ಎಂದು ಬರೆದುಕೊಂಡಿದ್ದಾರೆ.

​ಇದೇ ವೇಳೆ, ಇತ್ತೀಚೆಗೆ ಹಿಮಾಂಶು ಜಾಗ್ರಾ ಎಂಬುವವರು ಡೇಟಿಂಗ್ ವಿಚಾರವಾಗಿ ಮಾಡಿದ್ದ ಮಹಿಳಾ ವಿರೋಧಿ ಕಾಮೆಂಟ್‌ಗೂ ಮತ್ತು ಈ ಘಟನೆಗೂ ಸಾಮಾಜಿಕ ಜಾಲತಾಣಗಳಲ್ಲಿ ಹೋಲಿಕೆ ಮಾಡಲಾಗುತ್ತಿದೆ. ತಪ್ಪು ಮಾಡಿದಾಗ ಜವಾಬ್ದಾರಿ ಮತ್ತು ನೈತಿಕತೆ ಎಂಬುದು ಲಿಂಗಭೇದವಿಲ್ಲದೆ ಮಹಿಳೆ-ಪುರುಷ ಇಬ್ಬರಿಗೂ ಒಂದೇ ಆಗಿರಬೇಕು ಎಂಬ ಚರ್ಚೆಗಳು ಆರಂಭವಾಗಿವೆ.

​ಇನ್ನೊಂದೆಡೆ, ವಿವಾದಕ್ಕೆ ಕಾರಣವಾದ ವಿಡಿಯೋ ಕ್ಲಿಪ್‌ಗಳನ್ನು ಹಂಚಿಕೊಂಡಿದ್ದ ಹಾಸ್ಯನಟ ಪ್ರಣೀತ್ ಮೋರೆ ಕೂಡ ಸಾರ್ವಜನಿಕರ ಆಕ್ರೋಶಕ್ಕೆ ಹೆದರಿ, ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯನ್ನು ತಾತ್ಕಾಲಿಕವಾಗಿ ನಿಷ್ಕ್ರಿಯಗೊಳಿಸಿದ್ದಾರೆ (Deactivate) ಎನ್ನಲಾಗಿದೆ.

​ಕಾಮಿಡಿ ಶೋ ನೆಪದಲ್ಲಿ ಆರಂಭವಾದ ಈ ಘಟನೆಯು ಈಗ ವೈದ್ಯಕೀಯ ವೃತ್ತಿಪರ ನೈತಿಕತೆ, ದೇಹ ದಾನಿಗಳ ಮೇಲಿನ ಗೌರವ ಮತ್ತು ಸಾರ್ವಜನಿಕ ವೇದಿಕೆಗಳಲ್ಲಿ ಹಾಸ್ಯದ ಮಿತಿಗಳ ಬಗ್ಗೆ ದೇಶಾದ್ಯಂತ ದೊಡ್ಡ ಮಟ್ಟದ ಸಾರ್ವಜನಿಕ ಚರ್ಚೆಯನ್ನು ಹುಟ್ಟುಹಾಕಿದೆ.