ಅಮೋಹಾ (ಉತ್ತರ ಪ್ರದೇಶ): ಪ್ರೀತಿಗೆ ಕಣ್ಣಿಲ್ಲ ಎಂಬ ಮಾತಿಗೆ ಸಾಕ್ಷಿಯೆಂಬಂತೆ, ಉತ್ತರ ಪ್ರದೇಶದಲ್ಲಿ ವಿಚಿತ್ರ ಪ್ರೇಮ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಸಾಮಾಜಿಕ ಜಾಲತಾಣದಲ್ಲಿ ಪರಿಚಯವಾದ 40 ವರ್ಷದ ಮಹಿಳೆಯ ಪ್ರೇಮಕ್ಕೆ ಬಿದ್ದ 21 ವರ್ಷದ ಯುವಕನೊಬ್ಬ, ಮನೆ ಬಿಟ್ಟು ಓಡಿಹೋಗಿ ಮದುವೆಯಾಗಿರುವ ಘಟನೆ ಜಿಲ್ಲೆಯಲ್ಲಿ ಸಂಚಲನ ಮೂಡಿಸಿದೆ.
ಉತ್ತರ ಪ್ರದೇಶದ ಅಮೋಹಾ ಮೂಲದ 21 ವರ್ಷದ ಯುವಕನಿಗೆ ಆಗ್ರಾದ 40 ವರ್ಷದ ವಿಧವೆ ಮಹಿಳೆಯ ಪರಿಚಯ ಸಾಮಾಜಿಕ ಜಾಲತಾಣದ ಮೂಲಕವಾಗಿತ್ತು. ಆರಂಭದಲ್ಲಿ ಸ್ನೇಹದಿಂದ ಕೂಡಿದ್ದ ಇವರ ಸಂಬಂಧ, ದಿನಗಳೆದಂತೆ ಗಾಢ ಪ್ರೇಮವಾಗಿ ಮಾರ್ಪಟ್ಟಿದೆ. ಮಹಿಳೆಗೆ ಈಗಾಗಲೇ ಮದುವೆಯಾಗಿ ಮೂವರು ಮಕ್ಕಳಿದ್ದರೂ ಸಹ, ಆಕೆಯ ಪ್ರೇಮದ ಜಾಲಕ್ಕೆ ಬಿದ್ದ ಯುವಕ ಸಮಾಜ ಮತ್ತು ವಯಸ್ಸಿನ ಅಂತರವನ್ನು ಮರೆತು ಮನೆಯಿಂದ ನಾಪತ್ತೆಯಾಗಿದ್ದನು.
ಮಗ ಕಾಣೆಯಾದ ಬಗ್ಗೆ ಆತಂಕಗೊಂಡ ತಾಯಿ ಪೊಲೀಸರಿಗೆ ದೂರು ನೀಡಿದ್ದರು. ತನಿಖೆ ಕೈಗೊಂಡ ಪೊಲೀಸರು ಯುವಕನ ಮೊಬೈಲ್ ಲೊಕೇಶನ್ ಆಧರಿಸಿ ಹುಡುಕಾಟ ನಡೆಸಿದಾಗ, ಆತ ಆಗ್ರಾದಲ್ಲಿ ಸದರಿ ಮಹಿಳೆಯ ಜೊತೆಗಿರುವುದು ಪತ್ತೆಯಾಗಿದೆ. ಅಷ್ಟೇ ಅಲ್ಲದೆ, ಇಬ್ಬರೂ ದೇವಸ್ಥಾನವೊಂದರಲ್ಲಿ ಯಾರಿಗೂ ತಿಳಿಯದಂತೆ ಮದುವೆಯಾಗಿದ್ದರು ಎಂಬ ವಿಷಯ ಕೇಳಿ ಪೊಲೀಸರು ಮತ್ತು ಪೋಷಕರು ದಂಗಾಗಿದ್ದಾರೆ.
ಮಗನನ್ನು ಹುಡುಕಿಕೊಂಡು ಬಂದ ತಾಯಿ, ಮನೆಗೆ ಮರಳುವಂತೆ ಎಷ್ಟೇ ಗೋಗರೆದರೂ ಯುವಕ ಮಾತ್ರ ತನ್ನ ನಿರ್ಧಾರದಿಂದ ಹಿಂದೆ ಸರಿಯಲಿಲ್ಲ. “ನಾನು ನನ್ನ ಪತ್ನಿಯ ಜೊತೆಗೇ ಇರುತ್ತೇನೆ” ಎಂದು ಹಠ ಹಿಡಿದ ಯುವಕ, ತಾಯಿಯ ಎದುರೇ ಹೈಡ್ರಾಮಾ ನಡೆಸಿದ್ದಾನೆ. ಸುಮಾರು 19 ವರ್ಷಗಳ ವಯಸ್ಸಿನ ಅಂತರವಿದ್ದರೂ, ಮಹಿಳೆ ತನಗಿಂತ ಹಿರಿಯವಳಾಗಿದ್ದರೂ ಆಕೆಯನ್ನೇ ಮದುವೆಯಾಗಿರುವುದಾಗಿ ಯುವಕ ಪಟ್ಟು ಹಿಡಿದಿದ್ದಾನೆ.
ಆನ್ಲೈನ್ ಸ್ನೇಹ ಮತ್ತು ಆಕರ್ಷಣೆಗಳು ಯುವಜನತೆಯನ್ನು ಹೇಗೆ ದಾರಿ ತಪ್ಪಿಸುತ್ತಿವೆ ಎಂಬುದಕ್ಕೆ ಈ ಘಟನೆ ಕನ್ನಡಿ ಹಿಡಿದಿದೆ. ಸದ್ಯ ಈ ವಿಚಿತ್ರ ಜೋಡಿಯ ಮದುವೆ ಫೋಟೋಗಳು ಮತ್ತು ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದ್ದು, ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ವ್ಯಕ್ತಪಡಿಸುತ್ತಿದ್ದಾರೆ.
