ರಾಣೇಬೆನ್ನೂರು: ಸರ್ಕಾರಿ ಸೇವಾ ಕಚೇರಿಯಲ್ಲೇ ಹಣ ಪಣಕ್ಕಿಟ್ಟು ಜೂಜಾಟ ನಡೆಸಿರುವ ಗಂಭೀರ ಆರೋಪವೊಂದು ರಾಣೇಬೆನ್ನೂರು ಹೆಸ್ಕಾಂ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ತಾಲ್ಲೂಕಿನ ಚಳಗೇರಿ ಹೆಸ್ಕಾಂ ವಿಭಾಗದ ಕಚೇರಿಯಲ್ಲಿ ಇಲಾಖೆಯ ಸಿಬ್ಬಂದಿಗಳು ಗಣೇಶನ ಹಬ್ಬದ ಪ್ರಯುಕ್ತ ಜೂಜಾಟ ನಡೆಸಿದ್ದಾರೆ ಎಂದು ಆರೋಪಿಸಿ ಶ್ರೀಕಾಂತ್ ಗುಡಗೂರ ಅವರು ಹಿರಿಯ ಅಧಿಕಾರಿಗಳಿಗೆ ಲಿಖಿತ ದೂರು ಸಲ್ಲಿಸಿದ್ದಾರೆ.

​ಘಟನೆಯ ವಿವರ:

ಸೆಪ್ಟೆಂಬರ್ 16ರ ರಾತ್ರಿ 11.30ರ ಸುಮಾರಿಗೆ ಚಳಗೇರಿಯ ಸೆಕ್ಷನ್ ಆಫೀಸರ್/ಸಹಾಯಕ ಎಂಜಿನಿಯರ್ ಅವರ ಕಚೇರಿಯಲ್ಲಿ ಸಿಬ್ಬಂದಿಗಳು ‘ಅಂದರ್ ಬಾಹರ್’ ಜೂಜಾಟದಲ್ಲಿ ತೊಡಗಿದ್ದರು ಎನ್ನಲಾಗಿದೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ದಾಖಲೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಸಾರ್ವಜನಿಕ ವಲಯದಲ್ಲಿ ಆಕ್ರೋಶಕ್ಕೆ ಕಾರಣವಾಗಿದೆ. “ಇದು ಸರ್ಕಾರಿ ಕಚೇರಿಯೋ ಅಥವಾ ಕ್ಯಾಸಿನೋವೋ?” ಎಂದು ದೂರುದಾರರು ಪ್ರಶ್ನಿಸಿದ್ದಾರೆ.

​10 ಸಿಬ್ಬಂದಿ ವಿರುದ್ಧ ದೂರು:

ಹೆಸ್ಕಾಂ ವ್ಯಾಪ್ತಿಯ ಜೂನಿಯರ್ ಅಸಿಸ್ಟೆಂಟ್ ಹಾಗೂ ಲೈನ್‌ಮನ್‌ಗಳಾದ ಶಂಭು ಗೌರಿಹಳ್ಳಿ, ಕರಿಯಪ್ಪ ಕಟಗಿ, ಮಾರುತಿ ಕದಡಿ, ಭರತ್, ಹನುಮಂತ ರೆಡ್ಡಿ, ಮಂಜುನಾಥ ಸಿದ್ದನಗೌಡ, ನಾಗಪ್ಪ, ರಾಜು ದೊಡ್ಡಗುಣಿ, ಸಿ.ವಿ. ಮಂಜು ಹಾಗೂ ನಾಗರಾಜ್ ಡಿ.ಆರ್. ಸೇರಿದಂತೆ ಒಟ್ಟು 10 ಮಂದಿ ಸಿಬ್ಬಂದಿಗಳ ವಿರುದ್ಧ ರಾಣೇಬೆನ್ನೂರು ಗ್ರಾಮೀಣ ವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ಗೆ ದೂರು ನೀಡಲಾಗಿದೆ.

​ತನಿಖೆ ಹಾಗೂ ಕಠಿಣ ಕ್ರಮಕ್ಕೆ ಆಗ್ರಹ:

ಪ್ರಕರಣದ ಕುರಿತು ನಿಷ್ಪಕ್ಷಪಾತ ತನಿಖೆ ನಡೆಸಿ, ಆರೋಪ ಸಾಬೀತಾದಲ್ಲಿ ತಪ್ಪಿತಸ್ಥರ ವಿರುದ್ಧ ಕ್ರಿಮಿನಲ್ ಪ್ರಕರಣ ದಾಖಲಿಸುವುದರ ಜೊತೆಗೆ ಕಠಿಣ ಇಲಾಖಾ ಶಿಸ್ತು ಕ್ರಮ ಕೈಗೊಳ್ಳಬೇಕು ಎಂದು ದೂರುದಾರ ಶ್ರೀಕಾಂತ್ ಎಂ. ಗುಡಗೂರ ಆಗ್ರಹಿಸಿದ್ದಾರೆ.

​ಅಧಿಕಾರಿಗಳ ಪ್ರತಿಕ್ರಿಯೆ:

​”ಸರ್ಕಾರಿ ಸೇವಾ ಕಚೇರಿಯಲ್ಲೇ ಜೂಜಾಟ ನಡೆದಿದೆ ಎಂಬ ಆರೋಪ ಗಂಭೀರವಾಗಿದೆ. ತನಿಖೆ ನಡೆಸಿ ಆರೋಪ ದೃಢಪಟ್ಟರೆ ತಪ್ಪಿತಸ್ಥರ ವಿರುದ್ಧ ಕ್ರಿಮಿನಲ್ ಹಾಗೂ ಇಲಾಖಾ ಕ್ರಮ ಕೈಗೊಳ್ಳಬೇಕು.”

— ಶ್ರೀಕಾಂತ್ ಎಂ. ಗುಡಗೂರ, ದೂರುದಾರ

​”ಗಣೇಶ ಹಬ್ಬದ ನಿಮಿತ್ತ ಸಿಬ್ಬಂದಿಗಳು ರಾತ್ರಿ ಕಚೇರಿಯಲ್ಲಿ ಉಳಿದುಕೊಂಡಿದ್ದರು. ಜೂಜಾಟದ ದೂರು ಬಂದ ಹಿನ್ನೆಲೆಯಲ್ಲಿ ಈಗಾಗಲೇ ಸಿಬ್ಬಂದಿಗಳಿಗೆ ನೋಟಿಸ್ ನೀಡಲಾಗಿದೆ. ಉತ್ತರ ಬಂದ ತಕ್ಷಣ ಹಿರಿಯ ಅಧಿಕಾರಿಗಳಿಗೆ ವರದಿ ಸಲ್ಲಿಸಲಾಗುವುದು.”

— ನಾಗರಾಜ್ ಪೂಜಾರ್, ಎಇ, ಹೆಸ್ಕಾಂ ಚಳಗೇರಿ

​”ಕಚೇರಿಯಲ್ಲಿ ಜೂಜಾಟ ಆಡಿರುವ ಬಗ್ಗೆ ದೂರು ಬಂದಿದ್ದು, ಸ್ಥಳೀಯ ಅಧಿಕಾರಿಗಳಿಂದ ಮಾಹಿತಿ ಕೋರಲಾಗಿದೆ. ಸಿಬ್ಬಂದಿಗಳ ಉತ್ತರ ಪಡೆದ ನಂತರ ಸಮಗ್ರ ಇಲಾಖಾ ತನಿಖೆ ನಡೆಸಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು.”

— ಪ್ರಸಾದ್, ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್, ರಾಣೇಬೆನ್ನೂರು